បទ «ក.ខ»

                          ដោយ​ រ័ត្នន៍ សេនា

ក  កាន់ខ្មៅដៃពិច័យចិត្ត           

ខ ខំផ្ចង់ផ្ចិតដិតអារម្មណ៍          

គ  គិតពាក្យកាព្យរៀបផ្សែផ្សំ

ឃ ឃើញថាចំជាសេចក្ដី។

ង  ងប់សញ្ជប់ចងចុងចួន          

ច  ចេញស្ដែងខ្លួនលេងសម្តី

ឆ  ឆើតអើតអន់ទោះវែងខ្លី          

ជ  ជាក់គប្បីគ្រាន់បើដែរ។

ឈ ឈាមជ័រខ្មែរចង់ថែរទុក     

ញ ញ៉ាំងទំនុកកាព្យហូរហែរ

ដ  ដើម្បីស្ទួយវប្បធម៌ខ្មែរ         

ឋ  ឋិតថួនថែថេរកន្លង។

ឌ  ឌឺបញ្ឈឺដាក់ដងផ្លែ              

ឍ ធៀបគ្រាន់តែមានបំណង

ណ ណាយសម្តីអ្នកខ្លះផង        

ត  តែងឌឺដងថាកុំថ្វី។

ថ  ថាត្បិតតែចេះស្តួចស្តើង        

ទ  ទុកបានថ្កើងនិងគប្បី

ធ  ធៀបអ្នកចេះតែពុំស្ដី

ន  នឹងសល់អ្វីក្ស័យតាមកាយ។

ប  បើដូច្នោះអស់លោកអ្នក       

ផ  ផងកុំលាក់សូមចែកចាយ

ព  ពាក្យសរសេរកាព្យសម្រាយ  

ភ   ភាគបកស្រាយបង្ហាញញាតិ។

ម  មើលកំសាន្តបានចំណេះ      

យ  យកទៅត្រឹះរិះថែមទៀត

រ  រឹតនឹកគិតអំពីជាតិ                

ល  លែងចាកឃ្លាតជាតិវប្បធម៌។

វ  វិញ្ញាណខន្ធ័នៃដូនតា             

ស  សាធុកាឱ្យជ័យពរ

ហ ហើយសាសន៍គេមិនបន្ទរ      

ឡ ឡែបខាយមក៍មើលមាក់ងាយ។

អ  អង្គនៃខ្ញុំសូមអភ័យ               ​​​    

លោកអ្នកប្រុសស្រីផងទាំងឡាយ

នេះគំនិតស្មោះមិនឡែបខាយ       

សូមទានកុំស្តាយអត់ទោសា។

   ចំណាំៈ របៀបសង្កត់សំឡេង និងចាប់ចុងចួនគោរពតាមបទពាក្យ ៧

             ធម្មតា។ បន្ថែមតែត្រង់ យកព្យញ្ជនៈទាំង៣៣តួ  ក ខ...មួយចប់ 

              យកមកធ្វើជាព្យាង្គដើមឃ្លា គ្រប់ឃ្លាទាំងអស់។