បទ «មាន់ទឹកបណ្ដើរកូន» បែប រ័ត្នន៍ សេនា

ធ្លាប់ស្ម័គ្រស្មោះ ដោះដៃចោល បោលដោះដៃ     

កម្មក្រាស់ក្រៃ ម៉ៃហ្មងសៅ ហៅម៉ៃហ្មង

ល្បិចកិច្ចកល សល់សងគ្នា ពៀរសល់សង                             

រុំក្រៀកក្រង ចងចិត្តគុំ ឃ្លុំចងចិត្ត ។

វដ្ដសង្សារ ចារចែងកត់ បទចារចែង                                                 

ឥតថ្លឹងថ្លែង ក្រែងក្រឹត្យមាន គ្មានក្រែងក្រឹត្យ

ឯបើបាប ខាបខិតតាម ច្បាមខាបខិត                                    

យ៉ាងឆ្ងាញ់ឆ្ងិត ដិតដៅគិត និត្យដិតដៅ។

* របៀបសរសេរៈ

 ចំណាប់ចុងចួន និងលើកដាក់សំឡេង គោរពតាមបទពាក្យ៩ បន្ថែមនៅត្រង់៖

- ព្យាង្គ៣ ចួនព្យាង្គ៤, ព្យាង្គ៦ ចួនព្យាង្គ៧

- ព្យាង្គ៤ ផ្ទួនព្យាង្គ៨, ព្យាង្គ៥ ផ្ទួនព្យាង្គ៩, និង

- ព្យាង្គ២ រណ្ដំព្យាង្គ៣, ព្យាង្គ៤ រណ្ដំព្យាង្គ៥, ព្យាង្គ៨ រណ្ដំព្យាង្គ៩​នៅគ្រប់ៗឃ្លាល្បះទាំងអស់។

(១) ការតែងបែបថ្មីច្នៃចេញពីបទដើមនេះ ក្រៅអំពីការផ្ដោតអត្ថន័យនៃ«ឈ្មោះ»

មេកាព្យដើម ក៏មានការសិក្សា និងសង្កេតមើលទៅលើដំណើរសម្មភាព របស់មាន់ទឹក

​ផងដែរ និងធ្វើការផ្សំបញ្ចូលគ្នា ហើយបង្កើតចេញមក ។